Madagascar-Tribune.com

Aleo hilamina dia misesy

Penjy R. — 2009-01-10T02:41:11Z

Mbola misy raiamandreny azo hianteherana ve etoamin'ny firenena ? Tsy ho avelanay ho potiky ny ady an-trano ny firenena Malagasy, hoy ny komity nasionaly mpamolavola “Ny “Fiverenana Andoharano” .

Ny volana Aogositra no efa nanao antso avo teto amin'ny tanindrazana izahay, ka nahatonga ireo olobe isaky ny faritra nanao kaikavo ireo fotsy volo, toy ny tany Amoron'i Mania, ny hazo lava toy ny tany Toliara, ny tany Toamasina nanao barara. Midika izany, fa tsy hisy hifandraisany amin'ny hetsika politika izay tian'ny sasany atao eto izao hetsika hamerenana an'Andoharano izao. Io no nambaran'i José Razafimandimby, izay isan'ireo mpikarakara ny hetsika raha nihaona tamin'ny mpanao gazety tetsy tetsy amin'ny “Le Maestro” Betongolo omaly.

“Masina sy be vonihaitra ny fiainampirenena ka tsy sandaina amin'ny tombontsoan'olom-bitsy, hoy izy ireo. Ity fiverenan'Andoharano ity, dia voalaza fa tadidon'ny lasa, satria firenena efa nanana ny rafim-piaraha-monina isika talohan'ny andron'ny fanjanahan-tany” . Rehefa nanjaka teto ny Frantsay, dia nisy ny fomba nitantanany antsika. Tato afara dia niditra tamin'ny sosialisma sy ny demokarsia ary ny liberalisma. Sahirana hatrany anefa ny fifandraisan'ny vahoaka sy ny mpitondra. Rehefa nandinika ireto komity ireto, dia ny fiverenana amin'Andoharano no tsara indrindra. Nanana ny soa toavina isika, ary nipetraka hatrany ilay teny hoe valala iray hifanapahana, ary tondro tokana tsy mahazo hao. Io no làlana tsara indrindra hialana amin'ny fahapotehana, ka aloe haverina dien'izao.

Ny teny hierana nampirindra ny fiaraha-monina ka nahavitana ny lemaky Betsimitatatra isan-karazany no fototra maha-iray antsika, ary tsy hianteherana amin'ny any ivelany ny famerenana izany.

Olona 250 voapoizina

Penjy R. — 2009-01-08T04:11:01Z

Fifaliana amin'ny fiaraha-misakafo no naleha, nefa aretina no azo. Marary mafy ny olona miisa 250 ao Alatsinainy Bakaro raha nihinana sakafo tao amin'ny FJKM Anjozoro ny alahady atoandro lasa teo. Composé no sakafo fampidirana voalohany, ary vita io, dia naroso ny vary sy laoka, ka hena omby no nilaofana ny vary. Taorian'io, dia ripaky ny aretina ny iray trano.

Nifamonjena ny toeram-pitsaboana, saingy tsy naharaka izany ny mpitsabo tany an-toerana. Nandoa sy nivalana ny iray trano. Tsy naharaka ny fanafody tany amin'ny toeram-pitsaboana. Nanao antso avo taty an-dRenivohitra haingana ireo tompon'andraikitra any amin'io kaominina io, satria ambivitra ny ain'ireto vahoaka ireto. Tsy voafaritra mazava kosa anefa hatreto na nisy aina nafoy na tsia, fa efa nandefa mpitsabo any Alatsinainy Bakaro ny avy eo anivon'ny faritra Analamanga sy ny ny minisiteran'ny Fahasalamana namonjy haingana ireto olona ireto.

Ny fokontany Antevana sy Anjozoro no tena voa mafy amin'ity fihinanana sakafo niteraka aretina ity.

Mamely ny aretin'omby

Mandeha ny tombatomban'ny mponina any Alatsinainy Bakaro, fa mety ho aretina avy amin'ny omby no nahatonga izao fahavoazana izao. Niarahan'ny maro nahita ny fahavoazana tany amin'iny faritry Fianarantsoa iny. Raha ilay sakafo fampidirana, hoy ireo fianakavian'ny mponina tratry ny aretina, dia tsy nisy atahorana na ny atody nampiasaina na ny fahadiovana ihany koa. Efa mandeha ny fanadihadiana ataon'ny mpitsabo, ka ho hita eo ny marina. Mbola miady amin'ny aretina avokoa ireo mponina 250 ireo amin'ny fotoana hanoratanay izao.

Nahazo tso-drano avy any ivelany

Penjy R. — 2009-01-06T03:29:05Z

Tsy misy antony tsy hamahan'ny fanjakana ny fitakiana izay napetrakay. Io no nambaran'ny ben'ny tanàna, i Andry Rajoelina manoloana ny fitakiana izay tsy maintsy hilam-baliny hatramin'ny 13 janoary ho avy izao.

Raha nigadona teto an-tanindrazana tokoa ny ben'ny tanàna, i Andry Rajoelina, dia nanambara fa nihaona tamin'ireo ankolafin'olona maro tany ivelany. Manoloana ny toe-draharaham-pirenena ankehitriny eto Madagasikara no anton'izany fihaonana izany. Ny rivotra azo tamin'izao fialantsasatra izao, ary ny tso-drano azo. Fantatra tokoa fa samy nitso-drano azy avokoa ny ankamaroan'ireo olona nihaona taminy tany Paris. Isan'ireo ny mpitondra teo aloha.

Ny asa tsy arahim-bavaka hono tsy mahomby, koa araky ny efa nambara teto, dia tsy maintsy atao ilay fotoam-bavaka lehibe etsy Ambohijatovo ny alahady tolan-kandro ho avy izao. Hiarahany amin'ny vahoaka rehetra tsy ankanavaka io.

Fantatra fa tsy hihemotra amin'ny fitakiana izay efa napetrany ingahy ben'ny tanàna, ary efa vonona ny hanohana azy avokoa ireo mpanara-dia azy.

Tsy azo atao sorona ny toe-karena

Penjy R. — 2008-12-31T03:55:58Z

Ampy izay. Tsy hanaiky ho atao fitaovan'ny mpanao politika hitadiavana toerana intsony ny mponina eto Iarivo. Ny fampandrosoana izao no maika, fa tsy ny hidirana indray ao anatin'ny ady saritaka izay tsy nahitana tombontsoa hatramin'izay. Io no nambaran'ny depiote Jules Andriamaholison, izay voafidy teto amin'ny boriborintany voalohany.

Manomboka miarin-doha izao ny toe-karena. Samy mahatsapa izany isika rehetra. Mitodika aty Madagasikara, ny mason'izao tontolo izao, satria handray ilay fivoriana in-droa miantoana isika ato ho ato. Tsy endrika ratsy no aseho izao tontolo izao, fa vahoaka hendry sy milamina ary liam-pandrosoana. Izay no handraisanay fepetra hentitra amin'ny fanazavana ny saim-bahoaka amin'ny tsy ho fanekena ny vahoaka ho atao fitaovana politika toy ny hita hatramin'izay. Manana andraikitra lehibe amin'ny fiarovana ity tanàna ity izahay olom-boafidy eto.

Momba ny filazana fa hanangana « kianjan'ny demokrasia » ny mpanohitra, dia nanambara ihany ity depiote ity, fa misy ny demokarsia eto, satria maro be ireo haino aman-jery ahafahan'ny olom-pirenena maneho ny heviny eto. Ny mihoam-pefy kosa, dia misy lalàna mamaritra izany eto. Fanehoan-kevitra tsy misy toy ny tamin'ny 17 desambra lasa teo, saingy nahoana no tsy sahy niady hevitra ireto olona milaza fa voatampim-bava ireto. Tsotra ny tanjon'izy ireo, hoy ingahy dokotera Jules, fa miroborobo ny toe-karena eto, ka misy te-hanapotika indray io, satria very tombontsoa ireo mpanohitra ireo.

Hanapoaka ny sarom-bilany

Penjy R. — 2008-12-29T03:54:55Z

Heverin'ireto mpanohitra ireto ho fanomezana omena ny fitondrana ankehitriny amin'io taona ho avy io ny fanapoahana ny sarom-bilany. Ny datin'ny 13 janoary sisa handrasan'izy ireo, dia lasa izao, hoy ireo mpivory. Fantatra ihany koa fa efa misy ny komity najoron'izy ireo hanainga ny vahoaka isam-pokontany, rehefa tonga ny fotoana. Ingahy Andry Rajoelina, izay nahazo vaton'Antananarivo nandritra ny fifidianana izay ho ben'ny tanàna no lasa kankana tsy fidiny hanjonoana ny fon'ny mponina eto. Hanaiky izany ve anefa ny vahoaka ?

Toa tsy maha-taitra ny olona intsony ny fandrenesana resaka korontana ho atao eto. Iza no ahita tombontsoa ao anatin'ny firenena mikorontana ? Ny hanina ho hanina anio aza efa manahirana, hoy ny maro, ka izay olona very seza rehetra izao ve no andeha hamonoanay tena eny an-kianja.

Kianjan'ny demokrasia

Etsy Ambohijatovo no toerana noheverin'ireo mpanolon-tsainan'ny kaominina eto an-dRenivohitra ho hametrahana ilay « Kianjan'ny demokrasia ». Anio no voatondro fa hametrahana ny fangatahana eny anivon'ny Préfet de Police eto an-dRenivohitra. Isan'ny nankasitraka izany ireto vondron'ny mpanohitra ireto nivory ny sabotsy teo ireto. Ny tsy voafaritra mazava kosa hatreto, dia ny hoe ho voafehin'izy ireo ve ny tendrom-po tsy mba namana mety hitranga rehefa hamory vahoaka izy ireo ? Toa miendrika fihantsiana ny fitondrana ny nametrahana izany, satria handray ny andraikiny ny mpitandro ny filaminana, ka eo no hiatombohan'ny korontana rehetra.

Ho potika ny toe-karena

Rehefa misy ny korontana, dia hisy fiantraikany lehibe eo amin'ny fiainam-bahoaka sy ny toe-karena izany. Efa tafakatra hatrany amin'ny 7,5% ny tahan'ny harin-karena eto Madagasikara, raha niainga ambanin'ny aotra izany ny taona 2002 nisian'ireny krizy teto ireny. Maro ny ezaka natao, ary mbola be ireo tsy nahafa-po ny olona, indrindra ny resaka sosialy. Mahatsapa izany ny mpitondra, ary isan'ny nanaovana ilay jery todika tao anatin'ny loabary an-dasy farany teo izany. Miaiky ny rehetra fa ny ho tsara noho ny anio no tanjon'ny vahoaka matoa mitady isan'andro, saingy hiova amin'izany ve ny fiainany raha toa ka mitranga ny savorovoro, indrindra fa olona efa teo amin'ny fitondrana avokoa iretsy mikasa hanao fitaovana an'ingahy ben'ny tanàna iretsy ? Moa mba tsapan'ingahy ben'ny tanàna ve ny fanosehana ataon'ny mpanohitra azy ho an'ny amin'ny làlan'ny korontana ?

Hafa ny omaly sy ny anio

Hiroso tsy ho ela any amin'ny taona vaovao isika. Taona izay hitodian'ny firenena maro eran-tany aty Madagasikara. Midika izany fa hanana ny maha-izy azy eo anatrehan'izao tontolo izao isika, raha tsy hiteny afa-tsy ny resaka fizahan-tany fotsiny. Ho liana amin'ireo harena voajanahary maro be tsy fahita eran-tany ny vahiny. Tsy Ravalomanana no halaza amin'io, fa i Madagasikara iray manontolo. Hametraka fanamby isika eto Madagasikara, fa firenena hendry sy miray hina no eto, fa tsy firenena mikorontana no hitsenana vahiny. Hafa ny omaly sy ny anio. Tsara ny fanoherana, ary ilaina ny fanehoan-kevitra, saingy tsy ny korontana no amboara entina hampiakatra ny farim-piainan'ny isan-tokan-trano. Aseho ny hevitra hiarahana midinika, fa làlana iray ahafahan'ny mpitondra manitsy ny diany ny toy izany. Izay ilay fahaiza-mihaino tsara hanan'ny mpitondra, ary ny ho entina ihany koa ahay hanaja ny fifandimbiasan-toerana.

Avy any Ambatolampy ny 65%

Penjy R. — 2008-12-27T03:46:31Z

Zaro amin'ny làlana tokony ho izy ny ankizy. Manana adidy lehibe amin'io ny ray aman-dreny, ka tsy tokony atao an-kinanga. Mazàna dia ny ankizy mitoetra irery amin'ny ray na reny, vokatry ny fisarahan'ny mpivady no tena hipetrahan'ny fahasahiranana noho ny tsy fahampian'ny fitiavan-dray sy reny amin'ilay zaza.

Na mitoetra anilan'ny ray sy reny ihany koa aza anefa ny ankizy, dia matetika ny mpanampy no mikolokolo ireny zaza ireny, satria miasa ny ankamaroan'ny mpivady, ka tsy azo avela irery ireto kilonga ireto. Midika io, fa izay fanabeazana ataon'ilay mpanampy ao an-trano no hianaran'ilay zaza. Hatraiza anefa ny fari-pahaizan'ireny olona alaina hiasa an-trano ireny ?

Raha ny fanadihadiana natao tamin'ny tokan-trano vitsivitsy teto an-dRenivohitra, dia tsapa, fa ny 65% ny ankizy avy ao Ambatolampy no miasa an-trano eto sy ny manodidina. Eo amin'ny Ar15 000 ka hatramin'ny Ar 20 000 ny hakarama azy ireny. Mitaiza zaza sy manatitra mpianatra, ary mahandro sakafo no ataony amin'io karama io. Ny 20% ny ankizy miasa an-trano kosa dia avy ao Ambositra. Ny avy any Ambositra kosa, dia manodidina ny efatra alina ariary (40 000Ar) ny karaman'izy ireo. Mitovy amin'itsy ambony itsy ny asa ataony, saingy miampy fanasana lamba. Ary ny farany kosa, dia avy any Mahitsy. Lafo karama ny ao, ka aleon'ny olona manome saran-dàlana olona hafa haka mpanampy avy any amin'ireo toerana voalaza etsy ambony ireo.

Liana ahita an'Iarivo

Raha ny fanadihadiana natao ihany, dia maro amin'ireo olona avy any an-toerana lavitra ireo no maniry hiasa aty an-dRenivohitra. Ny asa an-trano no làlana afahana miakatra aty Iarivo. Miasa efa-bolana ao amin'ny fianakaviana iray anefa izy ireny, dia mivadika any amin'ny orinasa afaka haba. Manofa trano 30 000 Ar (telo alina ariary) izy ireo, izay ahitana efitra kely iray, miampy lakozia kely sy trano fivoahana hitambarana amin'ny daholo be dia efa vita ny fonenana vaovao. Tsy ho gaga isika raha maro amin'izy ireny ny olona avy any ambanivohitra no miasa amin'ireny orinasa ireny. Manambady aty izy ireo, ary miteraka. Maka olona avy any aminy indray izy ireo, hitaiza ny zanany eto, ary dia toy izay hatrany tranga miseho.

Hafa ihany i Neny

Tsy misy afa-tsy ny reny niteraka ihany no tena loharan'ny fampandrosoana ny ankohonana. Izy no nitondra folo volana ny zaza, ary mahalala ny maharary ny zanany. Ny lafiny fanabeazana io, dia miainga amin'ny fatahorana ilay nahary. Ny fahadiovan'ny zaza ihany koa dia voara-maso tsara. Ny fitiavan-dreny dia mitoetra ao anatin'ilay ankizy. Firy amin'ny tokan-trano Malagasy anefa no afaka manao izany amin'izao fianana sarotra izao ? Mila ezaka anefa ny fianakaviana amin'io sehatra iray io, satria làlana iray hitarafana ny ho avin'ny ankizy any aoriana any ny toy izany. Ny mifanohitra amin'io kosa, dia tsy ho gaga ianao, raha vao zaza vao mianatra miteny, dia efa miteniteny foana, satria izay tian'ny mpitaiza hampianarina azy no ataony. Tsy midika akory izany fa fositra ny ankizy alaina hiasa an-trano, fa maro amin'izy ireny kosa, no zara raha nandia kilasy. Midika io fa izay fahalala kely hananany no hampianariny izay olona tezainy. Ny fahombiazana tsara indrindra, dia zarina fahalalam-pomba ihany koa ny ankizy hiasa ao aminao, ary dia ho lavorary ny fianam-pianakaviana.

Hanao fotoam-bavaka iraisana etsy Mahamasina ?

Penjy R. — 2008-12-22T03:34:16Z

Eto no ivon'ny hetsika rehetra momba ny raharaham-pirenena. Izay mitranga eto, dia manaraka avokoa ny any amin'ny faritany. Taorian'ny zava-nisy ny herinandro lasa teo, dia tazana eto avokoa ireo mpitarika politika rehetra avy any amin'ny faritra samy hafa. Ny antony, dia miandry izay hitranga eto, ka hanamafy tosika izay hiseho.

Raha vao nivory niaraka tamin'ny mpanohitra tokoa ingahy Andry Rajoelina, dia efa tafapaka any amin'ny faritra samy hafa sahady izany. Misy mihitsy ny mikasa ny hametraka ny fikambana TGV any amin'ny faritra any, na dia mbola tsy tonga amin'izany aza ny tanjon'ny filoha mpanorina azy.

Ny an'ity farany aloha hatreto, dia ny fitakiana ny hanokafana ny fahita lavitra izay azy no maika. Eo ihany koa ny famelàna azy hiasa am-pilaminana sy ny ahafahan'ny rehetra maneho hevitra tsy misy sakana na fisamborana. Ny fanjakana kosa etsy ankilany, dia toa miandry kendritohina izay ho fihoaram-pefy ataon'ingahy ben'ny tanàna. Indrindra fa taorian'ny nilazany fa hametraka ny kianjan'ny demokrasia eto an-dRenivohitra izay izy ireo.

Atomboka amin'ny vavaka

Vita izay ny fampahafantarana ny fitambaran'ny hery rehetra amin'ny vahoaka. Hitohy ny hetsika rehetra araky ny efa nambaran'izy ireo tamin'ny haino aman-jery isan-karazany. Heno izao fa mety, hanao fotoam-pivavahana iraisana ireto vondromben'ny mpanohitra ireto amin'izao ankatoky ny fetin'ny Noely izao. Vavaka natao ho an'ny firenena izy io, ary ny fanirian'ny mpikatroka sasany dia ho atao eny amin'ny kianjan'ny Mahamasina. Misy kosa anefa no manambara fa aleo aloha entanina amin'ilay fanehoan-kevitra goavana ny mponina vao miroso amin'io. Fanirian'ireo antoko politika sasany ireo, izay ho entina ao anatin'ny fivoriany amin'ity herinandro ity.

Tafapetraka ny birao vaovao

Penjy R. — 2008-12-22T03:31:24Z

Vita ny kongresy rezionaly nataon'ny antoko TIM ny faran'ny herinandro teo. Vita ihany koa ny fe-potoana niasan'ireo birao teo aloha, ka nandray ny toerany ny birao vaovao. Tsangan-tanana teo anoloan'ny mpizaika rehetra, no nandaniana ireo birao vaovao teo anivon'ny TIM faritra Analamanga ny sabotsy teo. Lany tsy nisy nitsipaka ho filoha i Fidy Ratsimbazafy. Fantatry ny maro tsara izy io, satria filohan'ny faritra Analamanga ankehitriny. Ny filoha lefitra voalohany kosa, dia ny depiote Robert Razaka, ary ny filoha faha-roa ny kesitora etsy Tsimbazaza, Mamy Rakotoarivelo. Ny SG kosa dia i pasitera sady depiote Ravelonanosy Mamitiana, ary ny mpitantam-bola dia Randriamanantenasoa Rodolphe. Fanamby goavana no napetraky ny filoha vaovao, fa tsy maintsy ho lohalaharana amin'ny lafiny maro eto amin'ny firenena ny TIM Analamanga.

Tsipaipaika : 13 tapitrisa Ar

Hifanome tanana, fa tsy hifamingana ireo mpikambana rehetra miainga any amin'ny foko-TIM ary mipaka any amin'ny ambaratonga isan-tsokajiny. Hatevenina ny hidiran'ny olona ho ao amin'ity antoko ity, ary hiasa fa tsy natao hiatrika fifidianana fotsiny. Nandritra io fotoana io ihany koa no nanaovana ny tsipaipaika rehetra ho entina miatrika ny asa isan-karazany, ka vola mitentina Ar 13 tapitrisa no voangona io sabotsy maraina io tetsy amin'ny kianja mitafon'Ankorondrano. Ny filohan'ity antoko ity Ivan Randriasandratriniony no nitarika ny fotoana.

Tsy hiandry izay tsy vonona ny filoha

Penjy R. — 2008-12-17T03:44:06Z

Tsy naharototra ny antoko politika ny antso nataon'ny filoha Ravalomanana, amin'ny dinika ho atao eny Iavoloha anio. Hametraka ny sata hifehy ny antoko politika ny tanjona anio, nefa maro ireo antoko milaza tsy ho eny.
Tao anatin'izay fotoana vitsy nanaovan'ny filoha Ravalomanana antso avo izay, dia efa fantatra ireo antoko tsy ho eny Iavoloha anio. Isan'io ny CRN, tarihan'ny Profesora Zafy Albert. Ny Akfm misy an-dramatoa Gisèle Rabesahala, ny « Fihavanantsika » tarihan'ny pasitera Daniel Rajakaoba, ny SPDUN izay ingahy Lahiniriko Jean no filohany. Ny antoko AVI izay nihemotra tamin'ny ora farany noho ny fanakatonana ny fahitalavitra VIVA. Ingahy Norbert Lala Ratsirahonana ihany koa dia lasa any ivelany ny alatsinainy teo. Ny Farimbon'i Madagasikara vaovao misy an'i Pierre Andrianantenaina. Ny RPSD ahitana an'i Marson Evariste, ny antoko Arema miaraka amin'i Pierre Holder, ny Federalista misy an'i Tabera Randriamantsoa. Ny « Analamanga » miaraka amin'ingahy Avonel, ny « Herivelona Rasalama » ihany koa izay ingahy Avonel Andriantsilavo no voasoratra mitarika azy.

Ireo vonona hiady hevitra

Ireo ho antoko ho eny Iavoloha kosa dia ny antoko MFM miara-diaa amin'i Manandafy Rakotonirina. Ny Arema Matotra misy an'i Pierre Raharijaona, ny antoko MFM/3FM misy an'i Satrobory, ny antoko TEZA miaraka amin'i Moxe Ramandimbilahitra. Ny antoko Grad Iloafo misy ny loholona Rabetsitonta, ny PRM misy an'i Ralison Roger, ny « Tambatra », izay ny filohany mbola migadra eny Tsiafahy, Pety Rakotoniaina, ka ny solontenany no ho eny. Ny AKFM Fanavaozana miaraka amin'i Pasitera Andriamanjato Richard.

Ireto kosa ny antoko tsy hay na ho eny na tsia, satria manjavozavo be ihany no momba azy ireo. Ny RPSD vaovao misy an'i Voninahitsy izay migadra eny Tsiafahy, ny AME izay tarihan'i Raveloson Clément. Ny « Madagasikarantsika » misy an-dRamatoa Elia Ravelomanantsoa. Ny antoko MONIMA tarihan'ingahy Monja Roindefo.

Ireo no fantatra tamin'ny fotoana nanoratanay, ka mbloa mety misy ny hiova hevitra amin'ny ora farany.

Hatreto aloha, dia tsy miandry izay tsy vonona ny filoha Ravalomanana, fa dia hiroso amin'ny ady hevitra izy ireo anio.

Mitsentsitra ny ran'ny Malagasy

Penjy R. — 2008-12-16T04:02:10Z

Very maina ny ezaka atao eto, raha tsy voajery haingana ity resaka vidin-tsolika eto Madagasikara ity. Ny antony, dia voalaza fa tafakatra 7,5% ny fisondrotry ny harin-karena eto amintsika. Tsy hita anefa ny fiantraikany izy io noho ny afitsoky ireto goaibe mpanafatra solika vahiny ireto.

Nidina 45 dolara ny vidin'ny barilan'ny solika eo amin'ny tsena iraisam-pirenena, nefa mbola zara raha nahitana fidinany ny vidiny eto amintsika. Midika izany fa misy fitiavan-tena ny ataon'izy ireo, hoy ny filoha lefitry ny Grad Iloafo, Razafimahefa Herimanana. Tsentsafin'ny vidin'ny solika ny toe-karena Malagasy, ka tsy hita mipaka any amin'ny fiainam-bahoaka io tahan'ny toe-karena miakatra io. Tokony averina eo amin'ny fanjakana ny fanafarana itony solika itony, mba ahafahana mametra ny tena vidiny eto an-toerana. Manampy trotraka ity vidin'ny solika ity ihany koa ny ataon'ny banky eto amintsika, izay vahiny no mitantanana azy. Fampindramam-bola kely no atao, nefa midangana ny zana-bola alainy.

Vonona ny vahoaka

Manoloana ireo, dia ny fananana angovo no tokony ho atao laharam-pahamehana, hoy ity filoha lefitra eo anivon'ny Grad Iloafo ity. Vonona ny vahoaka hanohana ny ezaka hataon'ny fanjakana amin'ny mety fanerena ireto vahiny diso manararaotra ny Malagasy amin'ity vidin-tsolika eto amintsika ity. Terena no tokony ho atao azy ireo, fa ampy izay ny fiangaviana ny hamerenana ny vidin'ny solika amin'ny laoniny. Ar 2000 latsaka no tokony ho vidiny eny amin'ny mpaninjara. Hanaraka ny fidinan'io avokoa ny vidin'entana rehetra eto raha tanteraka izany. Hita fa mbola fehezin'ny vahiny ny toe-karena malagasy, ary manaiky izany isika matoa manao izay tiany atao izy ireo. Tsara ny milaza fa efa nitana andraikitra lehibe teo anivon'ny minisiteran'ny Angovo sy ny Harena ankibon'ny tany, Razafimahefa Herimanana, taona vitsy lasa izay, ka mahalala tsara ny mety ho vidin'ity solika ity.